પથિક લીંબાચીયા, અમદાવાદ:
31 જુલાઈ 2026:
ગુજરાત ચેમ્બર ઓફ કોમર્સ એન્ડ ઈન્ડસ્ટ્રી (GCCI) દ્વારા ૩૦ જુલાઈ ૨૦૨૬ના રોજ ગોલ્ડન ગ્લોરી હોલ, કર્ણાવતી ક્લબ, અમદાવાદ ખાતે વર્ષ ૨૦૨૬-૨૭ માટે વાર્ષિક સાધારણ સભા (AGM) અને નવા વરાયેલા હોદ્દેદારોનો પદગ્રહણ સમારોહ યોજવામાં આવ્યો હતો.
આ વાર્ષિક સાધારણ સભા સાથે નેતૃત્વનું વિધિવત હસ્તાંતરણ થયું હતું, જેમાં પ્રમુખ શ્રી રાજેશભાઈ ગાંધીએ વર્ષ ૨૦૨૬-૨૭ના કાર્યકાળ માટે GCCIના પ્રમુખ તરીકે પદભાર સંભાળ્યો હતો. સીનિયર ઉપપ્રમુખ શ્રી જિગીશભાઈ દોશી અને ઉપ પ્રમુખ શ્રી હિતેનભાઈ વસંતએ પોતપોતાનો પદભાર ગ્રહણ કર્યો હતો. આ સાથે કારોબારી સમિતિના નવા વરાયેલા સભ્યોની પણ જાહેરાત કરવામાં આવી હતી
વાર્ષિક સાધારણ સભા બાદ, નવા વરાયેલા હોદ્દેદારોને વિધિવત રીતે પદભાર સોંપવા માટે પદગ્રહણ સમારોહ યોજાયો હતો.
મહાનુભાવો અને સભ્યોનું સ્વાગત કરતા તત્કાલીન પૂર્વ પ્રમુખ શ્રી સંદીપભાઈ એન્જિનિયર તેમના કાર્યકાળ દરમિયાન ચેમ્બરની મુખ્ય સિદ્ધિઓ પર પ્રકાશ પાડ્યો હતો અને GCCIની પહેલોને આગળ ધપાવવામાં સભ્યોના સામૂહિક સહયોગનો આભાર માન્યો હતો. તેમણે વિશ્વાસ વ્યક્ત કર્યો હતો કે નવું નેતૃત્વ આ મજબૂત પાયા પર આગળ વધશે અને વેપાર તેમજ ઉદ્યોગના હિતોનું પ્રતિનિધિત્વ કરવામાં ચેમ્બરની ભૂમિકાને વધુ સુદ્રઢ બનાવશે.
સીનિયર ઉપપ્રમુખ શ્રી જિગીશભાઈ દોશીએ તેમનામાં વિશ્વાસ મૂકવા બદલ સભ્યોનો આભાર વ્યક્ત કર્યો હતો અને આગામી વર્ષ માટેનું પોતાનું વિઝન રજૂ કર્યું હતું. તેમણે વિશેષ કરીને MSME અને મોટા સાહસો માટે ઉદ્યોગ પ્રતિનિધિત્વને મજબૂત કરવા, સરકાર સાથે રચનાત્મક જોડાણ દ્વારા પ્રગતિશીલ નીતિ વિષયક સુધારાઓની હિમાયત કરવા તેમજ ગુજરાતમાં ‘ઈઝ ઓફ ડૂઈંગ બિઝનેસ’, ઔદ્યોગિક સ્પર્ધાત્મકતા અને સતત આર્થિક વૃદ્ધિને પ્રોત્સાહન આપતી પહેલો પર GCCIના નિરંતર ધ્યાન કેન્દ્રિત કરવા પર ભાર મૂક્યો હતો.
GCCIના પ્રમુખ તરીકે કાર્યભાર સંભાળ્યા બાદ પોતાના સંબોધનમાં શ્રી રાજેશ ગાંધીએ સભ્યોએ તેમના પર મૂકેલા વિશ્વાસ બદલ આભાર વ્યક્ત કર્યો અને ભવિષ્યમુખી તથા વધુ સશક્ત GCCI માટેનો પોતાનો વિઝન રજૂ કર્યો. તેમણે ગુજરાતના ઔદ્યોગિક વિકાસને નવી દિશા આપતા માનનીય મુખ્યમંત્રી શ્રી ભુપેન્દ્રભાઈ પટેલના દૃઢ નેતૃત્વની પ્રશંસા કરી તથા ગુજરાત સરકાર અને વાયબ્રન્ટ ગુજરાત ગ્લોબલ સમિટ–2027ને GCCI તરફથી સંપૂર્ણ સહયોગ આપવાની પ્રતિબદ્ધતા વ્યક્ત કરી. તેમણે નવીનતા (Innovation), MSME વિકાસ, ટકાઉ વિકાસ (Sustainability) અને ઉદ્યોગલક્ષી નીતિ ઘડતરને પ્રાધાન્ય આપતા કૃત્રિમ બુદ્ધિમત્તા (Artificial Intelligence), રમતગમત અને ઇન્ફ્રાસ્ટ્રક્ચર ક્ષેત્રે નવી સમિતિઓની રચનાની જાહેરાત કરી, જે ઉદ્યોગ-સરકાર સહયોગને વધુ મજબૂત બનાવવામાં તથા ગુજરાતને અગ્રણી રોકાણ ગંતવ્ય તરીકે વધુ સશક્ત બનાવવામાં મહત્વપૂર્ણ ભૂમિકા ભજવશે.
ગુજરાતના માનનીય મુખ્યમંત્રી શ્રી ભૂપેન્દ્રભાઈ પટેલે મુખ્ય અતિથિ તરીકે પદગ્રહણ સમારોહની શોભા વધારી હતી અને અને નવા વરાયેલા હોદ્દેદારોને અભિનંદન પાઠવ્યા હતા. તેમણે વિશ્વાસ વ્યક્ત કર્યો હતો કે નવું નેતૃત્વ ગુજરાત ચેમ્બર ઓફ કોમર્સ એન્ડ ઇન્ડસ્ટ્રી (GCCI)ની વેપાર અને ઉદ્યોગની સેવાની ગૌરવશાળી પરંપરાને વધુ મજબૂત બનાવશે. તેમણે ૨૦૨૪-૨૬ના કાર્યકાળ દરમિયાન ચેમ્બરનું સફળતાપૂર્વક સંચાલન કરવા બદલ તત્કાલીન પૂર્વ પ્રમુખ શ્રી સંદીપભાઈ એન્જિનિયરના નેતૃત્વ અને યોગદાનની પણ પ્રશંસા કરી હતી.
માનનીય મુખ્યમંત્રીશ્રીએ જણાવ્યું હતું કે ગુજરાત આજે દેશનું અગ્રણી રોકાણ કેન્દ્ર બનીને ઊભર્યું છે, જેનું શ્રેય રાજ્ય સરકારની પ્રગતિશીલ નીતિઓ, રોકાણકારલક્ષી અભિગમ તથા માનનીય વડાપ્રધાન શ્રી નરેન્દ્રભાઈ મોદીના દૂરંદેશી નેતૃત્વને જાય છે. તેમણે નીતિ ઘડતર, ઔદ્યોગિક વિકાસ તેમજ વાયબ્રન્ટ ગુજરાત ગ્લોબલ સમિટ જેવી પહેલોમાં GCCIના મહત્વપૂર્ણ યોગદાનની સરાહના કરી હતી. તેમણે ખાસ કરીને MSME ઉદ્યોગોને ગુજરાત ઇન્ડસ્ટ્રીયલ પોલિસી 2026ના લાભોનો મહત્તમ ઉપયોગ કરવા અનુરોધ કર્યો હતો તેમજ રાજ્ય સરકાર ઉદ્યોગોને પ્રોત્સાહન આપવા, નવીનતાને વેગ આપવા અને ગુજરાતને વૈશ્વિક ઔદ્યોગિક તથા ઇનોવેશન હબ તરીકે વિકસાવવા માટે સતત પ્રતિબદ્ધ હોવાનું પુનરોચ્ચાર કર્યો હતો.
આભારવિધિ કરતા ઉપ પ્રમુખ શ્રી હિતેનભાઈ વસંતે મુખ્ય અતિથિશ્રી, ઉપસ્થિત મહાનુભાવો, સભ્યો અને સહભાગીઓનો તેમની ઉપસ્થિતિ અને સમર્થન બદલ આભાર વ્યક્ત કર્યો હતો. ઉત્પાદન ક્ષેત્રની વૃદ્ધિ, નિકાસ અને વેપારને સક્ષમ બનાવવામાં પરિવહન અને લોજિસ્ટિક્સ ક્ષેત્રના વ્યૂહાત્મક મહત્વ પર પ્રકાશ પાડતા, તેમણે ગુજરાતના લોજિસ્ટિક્સ ઇકોસિસ્ટમને મજબૂત કરતી અને રાજ્યની એકંદર આર્થિક સ્પર્ધાત્મકતામાં વધારો કરતી પહેલોને પ્રોત્સાહિત કરવાની પોતાની કટિબદ્ધતા પુનઃઉચ્ચારી હતી.
આ પ્રતિષ્ઠિત સમારોહમાં અમદાવાદના મેયર શ્રી હિતેશભાઈ બારોટ, ગુજરાત સરકારના ઉદ્યોગ અને ખાણ વિભાગના વધારાના મુખ્ય સચિવ શ્રીમતી મમતા વર્મા (IAS), GCCIના પૂર્વ પ્રમુખશ્રીઓ, કારોબારી સમિતિના સભ્યો, GCCIના સભ્યો તેમજ વિવિધ ક્ષેત્રોના મોટી સંખ્યામાં આમંત્રિત મહેમાનો અને અગ્રણીઓ ઉત્સાહભેર ઉપસ્થિત રહ્યા હતા.
#bharatmirror #bharatmirror21 #news #india #bharat #hindustan #action #amazing #village #city #country #india #bharat #mostviral #trending #ahmedaba #GujaratChamberofCommerce&Industry #GCCIHostsAnnualGeneralMeetingandInstallationCeremonyofOfficeBearersfor2026–27 #gcci #AnnualGeneralMeeting #AGM #InstallationCeremony
