મુખ્યમંત્રી શ્રી વિજયભાઈ રૂપાણીની સંવેદનશીલ જાહેરાત
10 એકર સુધીની જમીન ધરાવતા અગરિયાઓને થયેલા નુકસાનમાં પ્રતિ એકર રૂપિયા 3000 ની સહાય આપવાનો રાજ્ય સરકારે નિર્ણય કર્યો
ગાંધીનગર, તા.16
મુખ્યમંત્રી શ્રી વિજયભાઈ રૂપાણીએ ગુજરાતમાં મીઠું પકવતા અગરિયાઓ પ્રત્યે સંવેદના દાખવીને તેમને પ્રતિ એકર રૂપિયા 3000 ની આર્થિક સહાય આપવાની જાહેરાત કરી છે. રાજય સરકારની આ મહત્વની જાહેરાતને પગલે રાજયના અગરિયા સમુદાયમાં ભારે રાહતની લાગણી પ્રસરી ગઇ છે.
તાઉ’તે વાવાઝોડા દરમિયાન અગરિયાઓને પણ નુકસાન થયું હતું. આ અંગે રાજ્ય સરકાર દ્વારા પ્રાથમિક માહિતી મેળવવામાં આવી હતી.
મુખ્યમંત્રી શ્રી વિજયભાઈ રૂપાણીએ અગરિયાની ચિંતા કરીને તેમને પણ આર્થિક સહાય આપવાનો સંવેદનશીલ નિર્ણય કર્યો છે. 10 એકર સુધીની જમીન ધરાવતા અગરિયાઓને થયેલા નુકસાનમાં પ્રતિ એકર રૂપિયા 3000 ની સહાય આપવાનો રાજ્ય સરકારે નિર્ણય કર્યો છે.
ગાંધીનગરમાં મુખ્યમંત્રીના નિવાસસ્થાને મળેલી કોર કમિટીની બેઠકમાં આજે આ મહત્ત્વનો નિર્ણય લેવાયો હતો. નાયબ મુખ્યમંત્રી શ્રી નીતિનભાઇ પટેલ, શ્રી ભુપેન્દ્રસિંહજી ચુડાસમા, શ્રી સૌરભભાઇ પટેલ, શ્રી પ્રદીપસિંહ જાડેજા અને વરિષ્ઠ અધિકારીઓ આ બેઠકમાં ઉપસ્થિત રહ્યા હતા. તમામ પાસાઓ ધ્યાનમાં લીધા બાદ અગરિયા સમુદાય અને તેમના પરિવારજનોની ચિંતા કરીને રાજયના મુખ્યમંત્રી વિજયભાઇ રૂપાણીએ સંવેદનશીલતા સાથે પ્રતિ એકર રૂ.3000ની સહાય આપવાનો રાજય સરકારે નિર્ણય કર્યો છે.
